الوصف جوه العربية اللى في النص
العربية اللى كانت بتاعة الستات
اللى بقت بتاعة الرجالة
حاكم احنا عندنا تمييز من اللى زى بتاع الابيض والاسود مش مهم
المهم الحالة واقف مش قاعد
الزحمة عامله دفا لكن احنا في الصيف يعني الجو حر
جانبي م اليمين ولد مامته شايلاه في سن 7 سنين لكنه من غير شعر
ممكن يكون عيان بالسرطان وممكن يكون اجرودي
لكنى حسيت انه مريض سرطان لان حواجبه اما شفتها مكانتش موجودة
المهم الام اللى شايلاه علي حيلها وهي واقفة زى
كانت حالتها مبتسمه لأ دي سعيده
حاولت ابص للواد وسرحت في ضحكة الست
كانت سمرة ومحجبه ومش جميلة
وبصيت علي اللى كانت بتكلمها رجليها كانت غريبة جداً وبتدل علي انها مش مهتمه بنفسها
لكنى كنت مبسوط وسرحت في انها ورغم تعبها وتقل الحمل عليها الا انها بتضحك من قلبها
قال وانا اللى كنت حاسس انى تعبان من مجرد انى واقف !!!
كان من العلامات المميزة ان فيه شباب متشعلق علي الباب كالعادة
وطبعاً كل محطة ينزلوا ويطلعوا ولخبطوا الركاب كالعادة
نزولاً وطلوعاً
كلهم عيال مابين 13 و 15 سنة
اه لو يعرفوا ان الغلطة بقطع رجل او ايد
وممكن يموتوا والعياذ بالله
سرحت وسمعت اصوات كتير وكأن كل العربية ببتكلم
وغطاعليهم كلهم صوت عجلات الترام وهي بتجري مع صوت مواتيرها
راجل معاه مراته شكله مش مصري ماهى اسكندرية اتملت من اخواتنا الليبيين
ضرب ابنه اللى مكملش 3 سنين تقريبا علي قفاه جامد لمجرد انه ماشي بالراحة
وكل الركاب كانت قرفانه م الراجل
من اللى عمله في ابنه
كل خمس دقايق كنت اشم ريحه من الروايح سواء الكريهة منها او الجميله
ليست هناك تعليقات:
إرسال تعليق