ازاى تقول يادين
ان الحجاب مطلب من مطالب العفه
مع ان الاولى تقول العفه في الاخلاق يا دين
قبل ماتقول قماش تغزى بيه العين
الاصوليه الدينيه مش حتموتك ياشعب
انما شرب الخمور والسجاير ونكاح بنات الليل
وبيع السلاح وفض طهارة العيون
حيخلي الدين جماد - عنيف
لعب البنات والولاد لعبه الاعمي
في معرفه تفاصيل الفروق
والبنت حلوه وصغيره ومغرور بيها قال
رغم انها متحجبة حجاب العقول
مايعرفوش
ان احتكاك الجسم مش كل المتعه
وان المتعه في احتكاك الروح
ازاى يافندي تصلي صلاه الضهر
والزبيبة علي راسك ساعه حيط
وفاتح الدرج وتقول ده رزق
وتشارك الغلبان طابور العيش
رغم انك حوت
ويبان عليك غلبان مقهور
مع انك تمتلك بيوت وعربيات
وحسابات في البنوك
وبتبحلق في اللى معاه قصور
ازاى يامؤمن لم تشارك
في لم الزباله من بيوت الله
زبالة المادة وزبالة النفوس
فرحان بلون اخضر وازرق وابيض
وعلامات التمييز وفرض دين علي دين
وبين ايدين الاله وقدام بيته
شوم وعصي وكرابيج وسلاح
بتبيعها باسم الدفاع عن النفس
بدل ماتقول اننا لازم نرجع
لاصول الاخلاق
وان حياه الانسان
اهم م الدفاع عن الدين
بيت من بيوت الله فرحانه بان ولادها كتير
رغم ان ولادها داخلينها نادى اجتماعي مش بيت صلاه
بفكرة انك تموت
وان التاريخ موت مش حياه
وان الاستشهاد مقتول من اصول الدين
وانت غلبان مقهور معزول جوه السور
ياايها المؤمن في دوله الجار
الدين الدولة ام الدوله الدين
مش شايف انك ترجع لحاله
الانسان
مش شايف
يادولة سامية
ان قتل اطفال عزل
والنبش في الجثث
ده شئ شنيع
دولتكم متطورة
لكن بلا روح
ازاى دوله تقوم الصبح وعلى ايدها دم 100 قتيل
الكل بيتعلم فيها شيل وتجارة وبيع السلاح
وفي الليل بتصلوا باسم الدين علي انه اول واسمى دين
ازيك يامؤمن
عجبك قتلك لاخوك باسم الدين
عجبك سلخ جلده حى باسم الدين
انا مش ضد الدين
انا ضد الكره في الدين
ضد تجاره القوانين الدينيه للانسان
ضد تقييد انسان
فالدين لازم يحترم الانسان
يكون انسان
بيتي بيت صلاه
وانتوا خليتوه ايه !!!!
رزق - سبوبه - نصبايه
تجاره ناجحه - تعصب اعمي
قنوات بتسب بعض - بتهيج الجماهير
بتملوا قلوب الناس كره
رغم ان كلمه حِب هي الاسمى
وانتوا م الاخر شوية لصوص ملاعيين
رفيق وجيه
9-8-2011
ليست هناك تعليقات:
إرسال تعليق