السبت، 17 ديسمبر 2016

( ميم & سي"م" )

ميم : انت عاوز ايه باللي بتكتبه ؟
سيم : ولا حاجه ، مجرد توثيق ...
م : طب وعاوز ايه من الحياه ؟
س : ولا حاجه برضوا
م : يعني مش عاوز تاكل تشرب ؟
س : دي اساسيات ، اعتقد ان كان سؤالك اكبر من كده
م : طيب ايه سبب وجودك ؟
س: مفيش سبب واضح ...
م : ازاى ؟
س: اظن جزء من تطور مش اكتر .
 م : بحس في كلامك ان مفيش حاجه بعد الحياه ؟
س: وانتى ليه عاوزه يكون في حياه بعد الموت ...
م : مش عارفه يعني نفسي اتعوض عن الحياه اللى عشتها هنا بحياه ارقي .
س : طيب وعلي فرض انك حققتي فوق كل ده في كل حاجه ، هل حتقدرى تستحملي الاتاحه دي للمنتهي ؟؟؟
 م : يعني انت لا ليك لزمه في الحياه ولا شايف ان فيه حياه بعد الموت طب وهو يبقي ليه فيه حياه علي الارض بالاساس وليه فيها بشر اساسا ؟
س : ورغم انك غيرتي الموضوع ، الا ان الموضوع بسيط الحياه عبث فوضوي متطور
م : بس الاديان بتنظم الحياه ؟
 س : بالعكس ، بالوقت العلم بيوصل حاليا لمناطق اعمق دراسه حاجات ماكنتش بتتشاف بالعين المجرده والعلم بيطور نفسه والاهم بيصلح نفسه باستمرار ولما بيبقي غلط بيعترف بغلطه ده معناه ان المنهجيه اللى قايم عليها حتفضل الاصدق لانها بتعترف بالخطأ عكس الاديان ، علي العموم مفترض ان الدين يقف عاجز عن احتواء ده وبالتأكيد حيخلي بشر كتير قصاد الجمود الفكري الديني حتتحول للالحاد او اللامبالاه او التطرف الشديد كرده فعل .
م : يعني انت معتقد ان الدين حيموت ؟
 س : انا ضد فكره تثبيت الاعتقاد لكن طبيعي باخد راى بجتذب اليه حسب منطقي وتحليلي سوا ثبت صحته او خطأه لكن انا مقلتش ان الدين حيموت ... بحب اطمنك الدين مش حيموت حيعيش بس حتتفتت الكتل الكبيره لطوايف اكتر بكتير من الموجود حاليا وبالتالي حتفقد جزء كبير من قوتها بس طبيعي حتبقي فيه صراعات قاتله داخليه
م : يعني انت بتقول ان السلطه الدينيه في خطر ؟
 س : مش السلطه الدينيه بس القفزات اللى حتتحقق قريب لو لو العالم مااقدمش علي عمل متهور باستخدامه لحروب نوويه وخلافه حيؤدي الى تدمير مهول او تخريب حيستمر العلم في تسهيل الحياه للبشر ويتجه تماما لاتمتة الحياه وحتختفي مجموعه كبيره من الوظايف حتم بالروبوت لحساب وظايف تانيه حتبقي مزدهره وده تحول بيتم في اي مرحله انتقاليه بين التطور الحضاري
م : انت بتوهني عن السؤال !!!!
 س : بالعكس بحاول اقولك راى بمنتهي الوضوح ومن اكتر من جهة ... اعتقد ان لو السلطه في العموم ماحاولتش تفهم بسرعه طبيعه التحول الحالى وبالتالى تغير من طريقة التفكير الخاصه بيها واعتمادها علي التفكير الكلاسيكي القديم في اتخاذ القرارات والمواجه وطبيعتها بين السلطه والفرد اعتقد ان السلطه الفرديه حتسود عن السلطه المركزيه وده حيخلي فيه مشاكل كبيره في الفتره الجايه وعدم استقرار اكبر لكن السلطات اللى حتقدر علي التفاعل السريع وتغير الشكل النمطي المعهود في رد الفعل بسن قوانين تتماشي مع التغيير ده اكيد مش حتحكم المجتمعات محلياً انما حتحكم الكوكب كله ... بس انتي ليه قلبتي الموضوع ديني ؟
م : طب انت عاوز الناس تعمل ايه ؟
 س : مش عاوز حاجه من الناس لان الناس في جميع الاحوال حتتطور سوا قبلت ده او لا انما طبيعه التفاصيل الصغيره اللي هي بتفرق في يومهم وتاخد من وقتهم نقدا ايجابا كان او نقدا سلباً وده بيخليهم بشكل كبير مايبصوش للموضوع نظره شموليه بالعكس بتفصلهم الاحداث الصغيره ويشوفوا انها احداث كبيره لكن في النهايه التطور بيحصل بيحصل ودايما اسمه تتطور زي سهم الزمن كده انه عمره مابيرجع لورا كمان التطور عمره في مجمله مابيرجع لورا .
م : تقصد ان الناس غبيه مش بتفهم ؟
 س : لا خالص ، اقصد قديما ان التطور مش بيبان للناس في لحظتها الفارقه بالنسبالهم وهي لحظة وجودهم الحاليه ، انما بيبان لما تلاقي تراكم معلوماتى للبشر في الاجيال اللي جايه ، وحاليا الناس بتعاصر التطور ده والترقي ده بشكل حقيقي وبقفزات سريعه اسرع بكتير من تطورهم البيولوجي في ال100 الف سنة اللى فاتوا وعليهم الاختيار بين العوده للعصور الوسطي ( اللي هو مش حيحصل في مجمل التطور ) للمواجهة ولمحاولتهم لاستقرار المجتمعات المعتمده كليا علي التجهيل والخرافه ، ده مش معناه انه حيحصل لكل البشر في الكوكب انما حيحصل لمجتمعات بعينها و....
يجلس " امنجي بسيط في احد المقاهي في وسط البلد " : انتوا بتقولوا ايه ياكفره باولاد دين الكل........

ليست هناك تعليقات:

إرسال تعليق