*يا أهل مصر المحروسه من كل عين ومن العيون
سايق عليكى والنبى أما أموت تحضنى في الناس مشاعرك
إديها بذرة خضره صغيرة للجدع ابن البلد الأصيل
واسقينى من ميه حنانك ارتوى لجل العطاشا والجياع للى زى
وادينى بنت حنينه ميته جنبى وملفوفه بكفنى بين السيده والحسين
*يا أهل مصر المحروسه من كل عين ومن العيون
سايق عليكى والنبى أما أموت تلملمى باقى حشايا معدتى لملمى
وكونى جيل جديد بولادك وخلى فيهم قلب طفل وعينين صبيه وحكمه كهل
*يا أهل مصر المحروسه من كل عين ومن العيون
سايق عليكى والنبى أما أموت خلي ابويا عريس وكأنه في الزفه
وأمى عروس النيل علي مركبه بدفه ياللى ظالمين الحقيقه افهموا معنى الحياه
في الحب الف معنى وبالحقيقة المطلقة حينكسر جوه قلوبنا الحلم ونموت
*يا أهل مصر المحروسه من كل عين ومن العيون
سايق عليك والنبى أما أموت تشقرى علي وردتى الحلوة الجميلة
وهيا في أحضان الغريب وتسلمى علي ابنها ابن الحياه
وشقى قلبى وعلمي منه للولد معنى المشاعر والعبث والحياة
المضحكه المجرمة المؤلمة خليه يعيش في الحنان
متفرقيش بينك وبينه يا حياة
*يا أهل مصر المحروسه من كل عين ومن العيون
سايق عليك والنبى أما أموت افرحى وهللى ونطى الحبال
انك خلصتى من عشيق مجنون ودقى مليون جرس وأدان الله أكبر بسم الصليب
*يا أهل مصر المحروسه من كل عين ومن العيون
سايق عليك والنبى أما أموت ارميلى ورده في الفضا وسط السكون
وأصرخى وجلجلى ملعون حب الحياه كرهته ومات مصلوب علي عكاز للأمل
ليست هناك تعليقات:
إرسال تعليق